Jer 42 | NdeIBE | STEP | Zonke izikhulu zebutho, kanye loJohanani indodana kaKhareya loJezaniya indodana kaHoshayiya, labantu bonke kusukela komncane kusiya komkhulu baya

Jeremiah 42

1 Zonke izikhulu zebutho, kanye loJohanani indodana kaKhareya loJezaniya indodana kaHoshayiya, labantu bonke kusukela komncane kusiya komkhulu baya 2 kuJeremiya umphrofethi bathi kuye, “Ake uzwe isicelo sethu ubakhulekele bonke laba abaseleyo kuJehova uNkulunkulu wakho. Ngoba njengoba lawe uzibonela khathesi, lanxa sake saba banengi khathesi kusele abalutshwana kuphela. 3 Khuleka ukuba uJehova uNkulunkulu wakho asitshele lapho okumele siye khona lalokho okumele sikwenze.”

4 UJeremiya umphrofethi waphendula wathi, “Ngizwile. Ngizakhuleka impela kuJehova uNkulunkulu wenu njengoba licelile; ngizalitshela konke uJehova akutshoyo ngingalifihleli lutho.”

5 Basebesithi kuJeremiya, “UJehova kabe ngufakazi wethu oqotho lothembekileyo uma singenzi okuvumelana lakho konke uJehova uNkulunkulu wakho akuthuma ukuba usitshele khona. 6 Lanxa kukuhle kumbe kukubi sizamlalela uJehova uNkulunkulu wethu esikuthuma kuye, ukuze kusilungele, ngoba sizamlalela uJehova uNkulunkulu wethu.”

7 Emva kwezinsuku ezilitshumi ilizwi likaJehova lafika kuJeremiya. 8 Ngakho wabiza uJohanani indodana kaKhareya lezikhulu zonke zebutho ezazilaye kanye labantu bonke kusukela komncane kusiya komkhulu. 9 Wathi kubo, “UJehova, uNkulunkulu ka-Israyeli, elingithume ukuba ngiyekwethula isicelo senu kuye, uthi: 10 Lingahlala kulelilizwe ngizalakha, ngingalibhidlizi, ngizalihlanyela ngingalisiphuni, ngoba ngilusizi ngomonakalo engawenza kini. 11 Lingayesabi inkosi yaseBhabhiloni, eliyesabayo khathesi. Lingayesabi, kutsho uJehova, ngoba ngilani njalo ngizalihlenga ngilikhulule ezandleni zayo.

12 Ngizakuba lesihawu kini ukuze layo ibe lesihawu kini ilibuyisele elizweni lakini.’

13 “Kodwa lina lingathi, ‘Kasiyikuhlala kulelizwe,’ ngalokho lingalaleli uJehova uNkulunkulu wenu, 14 njalo uma lisithi, ‘Hatshi, thina sizakuyahlala eGibhithe lapho esingayikubona khona impi loba sizwe icilongo kumbe silambele ukudla, 15 zwanini-ke ilizwi likaJehova, lina abasele koJuda. UJehova uSomandla, uNkulunkulu ka-Israyeli uthi: ‘Uma liphitshekela ukuya eGibhithe njalo lihambe ukuyahlala khona, 16 lapho-ke inkemba eliyesabayo izalifica khona, lendlala eliyesabayo izalilandela eGibhithe, njalo lizafela khonale. 17 Ngempela bonke abaphitshekela ukuya eGibhithe ukuba bahlale khona bazakufa ngenkemba, indlala lesifo; kakho lamunye wabo ozasinda loba aphephe kumonakalo engizabehlisela wona.’ 18 UJehova uSomandla, uNkulunkulu ka-Israyeli, uthi, ‘Njengalokhu ukuthukuthela kwami lolaka lwami kwehliselwa phezu kwabantu abahlala eJerusalema, ngokunjalo ulaka lwami luzakwehliselwa phezu kwenu lapho lisiya eGibhithe. Lizakuba yinto yokuthukwa lokwesatshwa, ukulahlwa lokuhlekwa; indawo le kaliyikuyibona futhi.’

19 “Lina abasele koJuda, uJehova ulitshelile wathi, ‘Lingayi eGibhithe.’ Wobani leqiniso lalokhu ukuthi: Ngiyalixwayisa lamhla 20 ukuthi lenza iphutha elikhulu kakhulu lapho langithuma kuJehova uNkulunkulu wenu lathi, ‘Sikhulekele kuJehova uNkulunkulu wethu; usitshele konke akutshoyo sizakwenza.’

21 Sengilitshelile lamhla, kodwa lilokhu lingalalelanga engilitshele khona. 22 Ngakho khathesi wobani leqiniso ukuthi lizakufa ngenkemba, indlala lesifo endaweni elifuna ukuyahlala kuyo.”